Savdo, fintex va «yashil» loyihalar: Octobank Xitoy bilan hamkorlikni qanday yo‘lga qo‘ymoqda
Octobank Markaziy Osiyoning kam sonli vakillaridan biri sifatida - China International Financial Exhibition xalqaro moliyaviy ko‘rgazmasi ishtirokchisiga aylandi. 18-20-iyun kunlari Octobank stendi oldida fintex kompaniyalari, to‘lov tizimlari va yetakchi xalqaro banklar vakillari bilan mazmunli muzokaralar o‘tkazildi. Asosiy e’tibor xalqaro hisob-kitoblar, raqamli infratuzilmani rivojlantirish va tashqi iqtisodiy faoliyatni qo‘llab-quvvatlash sohasidagi loyihalarga qaratildi.
CIPS rahbariyati bilan uchrashuv
Tadbir doirasida Octobank Boshqaruvi raisi Iskandar Tursunov va CIPS (Cross-Border Interbank Payment System) xalqaro to‘lov tizimi rahbari janob Xuan Fu o‘rtasida uchrashuv bo‘lib o‘tdi. Tomonlar Markaziy Osiyo uchun yuandagi to‘lov infratuzilmasini rivojlantirish, mintaqaviy korxonalarni CIPS tizimiga bevosita ulash istiqbollari va kelgusidagi hamkorlikni muhokama qildilar. Muzokaralar yakunida navbatdagi uchrashuvni O‘zbekistonda o‘tkazishga kelishib olindi.
«Xitoy — O‘zbekistonning asosiy tashqi iqtisodiy hamkorlaridan biridir. Biz O‘zbekiston-Xitoy savdo aylanmasi doirasida chegaralararo to‘lovlar, raqamli infratuzilma va tadbirkorlikni qo‘llab-quvvatlash yo‘nalishlarini rivojlantirishga intilmoqdamiz. Hamkorlik loyihalari va tajriba almashish uchun ochiqmiz», — dedi Iskandar Tursunov.
Bankning ishbilarmonlik sessiyasidagi taqdimoti va Xitoy ommaviy axborot vositalariga bergan intervyusi
Bank vakili Li xonim biznes sessiya ishtirokchilarini Octobank faoliyati va yutuqlari bilan tanishtirdi. Taqdimotda 2025-yilning I choragidagi ishlar sarhisob qilinib, asosiy rivojlanish yo‘nalishlari ko‘rsatib o‘tildi. Xususan, yilning dastlabki uch oyida bank 8,4 mln dollar sof foyda ko‘rdi, umumiy kapitalini 67,6 mln dollargacha oshirdi va rentabellik darajasi 49,7%ni tashkil etdi. Bank aktivlari 315,1 mln dollarga yetdi. Octobank brendi 30 mln dollarga baholangan va uning barqarorligi Moody’s va S&P xalqaro agentliklari tomonidan tasdiqlangan.
Bundan tashqari, Li xonim Xitoyning yirik ommaviy axborot vositalari — CCTV, Xinhua News Agency, Shanghai TV, Finance, Securities Daily va boshqalarga o‘z sharhlarini berdi. U Octobankning Xitoy va Markaziy Osiyo o‘rtasidagi savdoni rivojlantirish, yuan hisob-kitoblarini kengaytirish, texnologik hamkorlik va ekologik loyihalarda ishtirok etishga strategik sodiqligini ta’kidlab o‘tdi.
Octobank Xitoyning bir qator yirik ishtirokchi banklari — Bank of China, China Merchants Bank, Bank of Ningbo, China Postal Savings Bank, China Zheshang Bank, Bank of Xinjiang, Bank of Jiangsu, Zhejiang Chouzhou Commercial Bank shuningdek, xalqaro ishtirokchilar: Aktif Bank ((Turkiya), African Export-Import Bank, Standard Bank (JAR), HSBC (Buyuk Britaniya), Bangkok Bank (Tailand), TransBank (Mo‘g‘uliston), Bank Mandiri (Indoneziya) bilan quyidagi qo‘shma loyihalar bo‘yicha muzokaralar olib bordi:
Markaziy Osiyo texnologik innovatsiyalar jamg‘armasini tashkil etish;
Shamol energetikasi loyihasini moliyalashtirish uchun panda-obligatsiyalarini chiqarish;
Ant Chain bilan eksport bo‘yicha raqamli hisob-kitoblar uchun blokcheyn platformasini birgalikda ishlab chiqish;
CIPS interfeysini rus va o‘zbek tillarida mahalliylashtirish.
CIPS tizimi haqida
CIPS (Cross-Border Interbank Payment System) — Xitoy Xalq banki tomonidan ishlab chiqilgan xalqaro transchegaraviy to‘lovlar tizimi. U mamlakatlar o‘rtasida bevosita yuan hisob-kitoblarini korrespondent banklar ishtirokisiz amalga oshirish imkonini beradi. Bugungi kunda CIPS 180 + mamlakatdan 170 dan ortiq bevosita va 1500 dan ortiq bilvosita ishtirokchilarni birlashtiradi.
Octobank CIPS tizimini Xitoy va Markaziy Osiyo davlatlari o‘rtasidagi iqtisodiy aloqalarni kuchaytirish strategiyasi doirasidagi asosiy vositalardan biri sifatida baholaydi.
